Kenía, Tansanía og Sansibar

Flogið af stað frá Keflavík.

Ferðin hefst í Naíróbí þar sem í boði er m.a. að heimsækja Karen Blixen-safnið þar sem höfundurinn bjó og var vettvangur bókar hennar Jörð í Afríku. Þá verður farið á Masaí-markað og borgin skoðuð. Hópurinn á kost á að kynna sér Little Bees-skólann í fátækrahverfi Naíróbí sem Vinir Kenía og Tansaníu hafa stutt í yfir 20 ár. Einnig er í boði að heimsækja Önnu Þóru í Haven Rescue Home, en hún hefur í mörg ár haldið úti heimili fyrir ungar mæður á aldrinum 12–18 ára og veitt þeim menntun, sálfræðistuðning og opnað fyrir ný tækifæri í lífinu.

Næst er haldið til Mwanza sem kölluð er Rock City, þar sem hún er byggð á hæðum, þöktum stórum steinum. Þar býðst þátttakendum að kynnast starfi Hakizetu-samtakanna, sem reka saumaskóla þar sem ungar stúlkur læra saumaskap og í boði er að láta sauma á sig afrísk föt úr litríkum efnum. Þá verða samtökin Nourish Africa kynnt, en þau vinna að fræðslumálum í umhverfisvernd og fjármagnar ferðin m.a. trjáræktar- og fræðsluverkefni sem unnið er í samvinnu við samtökin. Þá er í boði að sigla út á Sanaane-eyju, sem er minnsti þjóðgarður Tansaníu í 8 mínútna siglingu frá hótelinu, og rölta þar innan um fjölskrúðugt dýralíf.

Að morgni 19. júní koma safaríjeppar og sækja hópinn og eftir fund með fararstjórum heldur hópurinn sem leið liggur í Serengeti-þjóðgarðinn, þar sem hægt er að sjá stórkostleg villt dýr í sínu náttúrulega umhverfi. Gist er í lúxus-tjaldbúðum þar sem fólk sofnar við svæfandi hljóð villtra dýra. Í safaríinu er fylgt The Great Migration, þar sem milljónir hjarðdýra stefna í norður í fylgd rándýra af öllu tagi.

Eftir tvær nætur í tjöldum er ekið út úr þjóðgarðinum með viðkomu í Masaíaþorpi og gist í lúxus-„lodge“. Daginn eftir er ekið niður í hinn magnaða Ngorongoro-gíg þar sem finna má langflestar dýrategundir, m.a. The Big Five: fíl, hlébarða, ljón, buffal og nashyrning. Að því loknu er ekið sem leið liggur á Kilimanjaro-flugvöllinn og flogið í um klukkustund til Sansibar.

Gist er í tvær nætur í Stone Town í Sansibar þar sem má upplifa heillandi blöndu arabískrar, evrópskrar og afrískrar menningar á þröngum götum innan um kryddmarkaði. Síðan er haldið á strandhótel þar sem hópurinn dvelur þrjár nætur við hvíta ströndina – í algjörri afslöppun, eða hann nýtur afþreyingar sem í boði er; að freista þess að snorkla með höfrungum, skoða kryddbæi eða fá leiðsögn á ýmsar gerðir brimbretta.

Flogið aftur heim.